Në Samitin e së Ardhmes (Summit of the Future) zhvilluar në shtator 2024, u ritheksua rëndësia e Konventës për Eliminimin e të gjitha Formave të Diskriminimit ndaj Grave (CEDAW) i cili është një gur themeli për avancimin e barazisë gjinore dhe fuqizimin e grave në nivel global. Liderët botërorë dhe përfaqësuesit e shoqërisë civile nënvizuan se barazia gjinore është një e drejtë themelore e njeriut dhe një shtyllë e pazëvendësueshme për ndërtimin e një bote më paqësore, të qëndrueshme dhe të begatë.
Samiti theksoi se përparimi drejt Objektivave të Zhvillimit të Qëndrueshëm (SDG) kërkon përpjekje të bashkërenduara për të eliminuar të gjitha format e diskriminimit ndaj grave. Për të arritur këtë, pjesëmarrësit e samitit ranë dakord për disa veprime kyçe:
- Forcimi i kuadrit ligjor: Vendosja dhe zbatimi i kornizave më të forta ligjore në nivel kombëtar dhe ndërkombëtar për të garantuar mbrojtjen dhe respektimin e të drejtave të grave.
- Bashkëpunimi ndërkombëtar: Rritja e bashkëpunimit ndërmjet vendeve për të luftuar fenomenet ndërkufitare si dhuna ndaj grave, trafikimi dhe shfrytëzimi seksual.
- Fuqizimi ekonomik dhe arsimimi i grave: Shtimi i investimeve në arsimimin dhe fuqizimin ekonomik të grave, për të reduktuar pabarazinë dhe për të krijuar më shumë mundësi për pjesëmarrjen e tyre aktive në të gjitha sektorët e jetës shoqërore.
- Luftimi i praktikave diskriminuese: Intensifikimi i përpjekjeve për të çrrënjosur normat dhe praktikat kulturore që perpetuojnë diskriminimin dhe pabarazinë ndaj grave dhe vajzave.
- Përfshirja e grave në proceset e paqes: Garantimi që gratë të kenë një rol aktiv dhe të sigurt në proceset e zgjidhjes së konflikteve dhe rindërtimit pas konflikteve, duke njohur kontributin e tyre në paqen dhe sigurinë ndërkombëtare.
Samiti përforcoi nevojën për veprime konkrete dhe urgjente për të zbatuar plotësisht parimet e CEDAW dhe për të siguruar që të drejtat e grave të jenë të mbrojtura dhe të respektohen në çdo nivel. Përkushtimi për barazi gjinore mbetet i fortë, me synimin për të ndërtuar një botë ku çdo grua dhe vajzë të jetojë me dinjitet dhe të drejta të barabarta, duke kontribuar në një shoqëri të drejtë dhe të zhvilluar.
Organizata ALVA –Albanian Values –Vlerat Shqiptare u përfshi në fushatën Cities for CEDAW me rastin e ditës Ndërkombëtare të Paqes zhvilluar në Ditët e Veprimit të Samitit për të Ardhmen në mbështetje të ndërtimit të një bote ku çdo grua meriton të jetojë me dinjitet dhe të drejta të barabarta, kudo ku ajo jeton. Gratë shqiptare meritojnë të ndërgjegjësohen se meritojnë të vlerësohen për punën e tyre me dinjitet dhe respekt, të lira, në paqe dhe në drejtësi. Çdo grua meriton respekt.
Shënim: Naxhi Bakalli është piktori i valltares shqiptare me kostum popullor tek posteri ALVA-s.
