Nga vjen kjo muzikë?
Vjen nga takimi i petaleve në lulet,
atje ku ndeshja e dy zhuzhakëve të kaltër
atje ku kodra zë ulet;
po vjen dhe nga rënia e vesës,
veçse kjo ndodh kur nata është e kristaltë
dhe pakëz e freskët.
Nga vjen kjo muzikë?
Vjen nga zërat e mijërave karkalecëve,
e mijëra bulkthëve,
që shkojnë si krushq në dasmë
të marrin nusen me nuseve,
se ndofta për dasëm është shënuar kjo natë.
Nga vjen kjo muzikë?
Vjen nga fërkimi i pluhurit të yjeve,
pluhur që tokën spërkat si shi i padukshëm
sipër shtëpive, arave dhe pyjeve,
që s’është aspak si shirat e bujshëm;
vjen nga gjoksi i deteve
që guduliset nga kurrizet e balenave dhe anijeve
dhe kruhet prej oktapodëve dhe peshqve,
prej gaforreve, breshkave dhe kërminjve.
Dritëro Agolli
